ایراندا آذربایجان خالقینین اینسان حاقلاری قورومونا (آهراز) چاتان خبرلر، تبریزده ترک آذربایجانلی مدنی و فرهنگی فعاللارا قارشی تهلوکه‌سیزلیک فشارلارینین داوام ائتدیگینی گؤستریر. ان سون حادثه‌ده تبریز اطلاعات اداره‌سینین ممورلاری ترک آذربایجانلی مدنی و فرهنگی فعال وحید ولی‌زاده‌نین ائوینه گلیب، اورادا آختاریش آپاریبلار.
آلینان بیلگیه گؤره، آختاریش زامانی ممورلار وحید ولی‌زاده‌نین ال تلفونونو و لپ‌تاپینی ضبط ائدیب آپاریبلار.
وحید ولی‌زاده ترک آذربایجان دیلی و فرهنگی ساحه‌سینین فعالیدیر و آذربایجانلا باغلی مدنی، فرهنگی و ایجتیماعی ساحه‌لرده فعالیت سابقه‌سینه مالیکدیر.
بو اقدام، سون گونلرده تبریزده بیر سیرا ترک آذربایجانلی مدنی فعالین چاغیریلماسی، سورغو-سوال ائدیلمه‌سی، توتولماسی و اونلارا فشار گؤستریلمه‌سی باره‌ده خبرلرین یاییلدیغی بیر شرایطده باش وئریب.
بو حسابات حاضیرلاناندا قدر، وحید ولی‌زاده‌نین ائوینده آختاریشین سببلری، اونا قارشی ممکن ایتهاملار و تهلوکه‌سیزلیک و عدلیه قوروملارینین اونونلا باغلی قراری باره‌ده دقیق بیلگی یوخدور.
